Sapian, Capiz – May yara na sang lead ang Sapian PNP may kaangtanan sa kamatayon ni Arnel Aninang, 62-anyos sang Sitio Lubog, Barangay Damayan,Sapian Capiz. Ginpahayag ni SPO4 Alberto Hachuela deputy Chief of Police indi pa nila mapalayag sa kahanginan ang ang pangalan sa mga suspek bangud nagapadayon pa ang ila manhunt operation agu madakpan ang mga may kahimuan sa pagpatay kay Aninang.
Sa madumduman nga ginbawian sang kabuhi ang biktima matapos mag-angkon sang madamo nga igo sang bala sa dughan kag iban pa nga bahin sang lawas. Suno sa asawa sang biktima nga ginkilala kay Chona Aninang nga ginsubay sang mga ini ang dalan pauli sa ila poluy-an sakay sa karosa.
Nakit-an sini ang duha ka mga suspek nga lalaki nga lunsay nagasuksok sang jacket kag nakatabon ang guya. Ginluthang sang wala makilala nga mga suspek ang biktima sang makapila ka beses kag madasig ang mga ini nga nagpalagyo. Nagahapa-on na kag wala sang kabuhi ang biktima nga si Arnel Aninang bangud sang madamo sini nga igo sa lawas.
Nagluntad ang insidente alas 10:30 kahapon sang aga sa Sitio Lubog Brgy. Damayan, Sapian, Capiz. Pagtimalos naman ang ginasunod nga motibo sang insidente samtang nagapadayon pa ang imbestigasyon sang mga kapulisan.
(photo from Sapian PNP)
