62 ka mga pamilya nga nagaistar sa higad sang suba sa banwa sang Tampakan ginarekomendar nga irelocate.

Ginarekomendar sa subong ang pagrelocate sa 62 ka mga pamilya sa banwa sang Tampakan, South Cotabato tungod delikado ang ginaistaran sang mga ini sa pagbaha.
Suno kay Maam Dads Bacalso, operations chief sang Provincial Disaster Risk Reduction and Management Office South Cotabato sa bahin sang Riverside kag Sitio Topland sa Barangay Lampitak yara sa 50 ka mga pamilya ang dapat marelocate tungod yara sa higad sang suba ang ila nga puluy-an.
Sa subong sa tion nga maglain suno pa ang panahon partikular na sa oras sang kagab-ihon ginapabakwit sila matapos nga sang Lunes sang gab-i duha ka mga puluy-an ang naanod sang tubig baha.
Samtang sa Brgy. Kipalbig naman sa nasambit nga banwa yara sa dose ka mga pamilya ang irelocate kag may-yara naman sang relocation site para sa ila.
Ginkumpirmar man ni Bacalso nga apektado man ang dalanon sa Brgy. Liberty sa banwa sang Tampakan tungod sa pag-awas sang tubig sa box culvert amo nga ginapahalong ang mga motorista nga mag-agi sa nasambit nga area.
May-angot sini gilayon naman nga nagrespondir ang Provincial Engineering Office agud nga magpatigayon sang clearing operation sa lugar.
Naghatag man sang food kag non –food assistance ang lokal nga panggobyerno sa mga apektado nga residente sa nasambit nga mga barangay.