62 ka slot machine, nakumpiska sa kapulisan

General Santos City*—*malampusong nakumpiska sa operatiba sa City Public Safety Company ang mukabat 62 ka mga Slot Machine (Tolendoy) sa area sa Prk. Cawa, Barangay West Gensan.
Alas 12:00 pasado ang takna sa kabuntagon Sabado, July 22, 2017 dihang dunay nakasumbong sa kapulisan nga dunay usa ka sakyanan sa Prk. Cawa nga gikargahan ug daghang unit sa Tolendoy.
Gilayon usab kining girespondihan sa otoridad apan wala na nasikop pa ang tulo ka mga suspek nga posibling nagdala sa maong sakyanan human malampusong nakasibat dihang nasayran nga padulong ang presensya sa kapulisan.
Gilayon usab nga giturn-over sa Police Station 1 ang maong mga Slot Machine, samtang ginasuta pa ang mga nanag-iya niini.
Gikatakda usab nga sutaon sa kapulisan ngadto sa buhatan sa LTO ang nanag-iya sa sakyanan aron nga makabaton ug lead ang kapulisan sa nanag-iya sa maong slot machine.
Kahibaluan nga mukabat sa 22 ka slot machine usab ang nakumpiska sa mga otoridad sa miaging semana sa Prk. Palen Labangal ning dakbayan kon asa gisakay sa jeep.

Facebook Comments