Gipasigarbo sa Philippine Drug Enforcement Agency (PDEA)-Bukidnon nga 62% na kon 288 ka mga barangay sa probinsya ang gikonsiderang drug cleared.
Kini ang gibutyag ni Alex Subang, PDEA-Bukidnon Agent atol sa interview sa RMN DXMB Malaybalay.
Sumala ni Subang nga nakab-ot sa buhatan ang target karong tuiga diin nahimong Best Provincial Office for Brgy. Drug Clearing sa Northern Mindanao.
Dugang ni Subang nga malampusong napahigayon ang 84 ka mga anti-drug operation karong tuiga diin 42 na ka mga kaso ang napasaka sa paglapas sa RA 9165 kon ang Comprehensive Dangerous Drugs Act of 2002.
Dugang usab ni Subang nga mukabat sa P360, 706.12 ang kantidad sa droga nga nakompiska sa mga gipahigayon operasyon diri sa probinsya sa Bukidnon.
Apan giklaro usab ni Subang nga wala nahimong sayon ang pagkab-ot sa maong mga kalampusan tungod kay grabe nga monitoring ang ilang gipahigayon ilabi na sa mga anti-drug operations.
Sulti usab niya nga galisud sila sa mga dagko nga area nga mga barangay tungod kay daghan nga mga high value target ang nangadakpan apan adunay musulpot og kalit sa listahan.
Maong panghinaut ni Subang nga sa sunod tuig 2022, padayon ang suporta nga ipadangat sa lokal nga pangagamhanan ug sa uban pang mga hingtungdang ahensiya ug makuha ang nahibiling 155 ka mga uncleared barangay sa illegal nga droga.
