Pagadian City – Nahugyaw ang Pagadian City Gymnasium diha nipaso na ug nidawat sa iyang diploma ang 64 anyos nga tri-sikad driver atol sa gradwasyon niini kagahapon.
Siya mas nailhan nga si Tatay Generito Yosores, lumad nga lumulupyo sa lungsod sa Molave ning probinsya sa Zamboanga del Sur nga migradwar sa kursong Bachelor of Secondary Education Major in English didto sa Western Mindanao State University External Studies Unit Molave Campus ug apil sa 1,397 ka mga graduates.
Bisan nagikan sa kabus nga pamilya, naningkamot si Tatay Generito nga muhuman sa kolehiyo taliwala sa iyang pangidaron gumikan sa iyang pangandoy kaniadto pa nga mahimong propesyonal.
Tri-sikad driver sa adlawan apan estudyante sa panahon sa kagabihio, kini ang dagan sa kinabuhi si Tatay Generito.
Sumala pa niya, karun palang duna na’y mga opotunidad sa trabaho ang gitanyag kaniya.
Mahimduman nga nagviral usab sa Facebook ang hulagway ni Tatay Generito dihang gipost kini niadtong Marso 30 ning tuiga.
