Gerenal Santos City—Patay nang nakaplagan ang usa ka Rodolfo Antonio, 67 anyos nga taga Packing 1, Barangay Mabuhay Gensan alas 3:00 ang takna sa hapon sa may Promise Land-2, Barangay Mabuhay.
Basi sa blotter report sa Police Station 4, alas 12:00 ang takna sa udto dihang nakit-an sa mga residenti sa Promise land ang nasangpit kansa hubog ug nagbitbit pa ug botelya sa ilimnong makahubog.
Pila ka oras nag nakalabay, nakit-an ang biktima nga naghigda sa bakanting luna sa maong lugar. Tungod naanad na ang mga residenti nga makit-an ang nasangpit nga kung mahubog matulog bisag asa lang ila kining gipasagdan.
Apan alas 3:00 sa hapon dihang natingala na ang mga residenti nga wala pa gihapon nimata ang nasampit mao nga ila nang gisuta ug didto na ilang gikakurat human nga wala na nag-ginhawa ang biktima.
Didto na dayon sila mitawag ug police aron nga sutaon ang maong biktima. Gituohang giatake sa iyang balatian ang 67 anyos kansa dugay na matud pa niining gihambin sa iyang lawas.
