Davao City – Gipusil-patay ang usa ka senior citizen bandang alas 4:45 kaganinang kadlawun, September 2, 2018 sa national highway, Prk. Pag-asa, Sitio Alang-alang, Brgy. Malabog, Paquibato District ning syudad sa Davao.
Sa report gikan sa Paquibato PNP, giila ang biktima nga si Andrea Villarino Baguio alyas Andring, 68 anyos ug residente sa Purok Bird, Paradise, Brgy. Malabog sa maong distrito.
Base sa inisyal nga imbestigasyon sa kapulisan, nag inusarang nagbaktas matud pa ang maong biktima padulong sa Iglesia Ni Cristo (INC) sa Sitio Crossing sa maong brgy. aron musalmot sa misa apan pag abot sa nasangpit nga incident area, gipusil sa mga wala mailhing suspetsado ang senior citizen sa makadaghang higayon ug naigo sa nagkadaiyang parte sa lawas hinungdan sa hinanaling kamatayon niini.
Daling misibat ang mga suspek human sa panghitabo samtang ang kapulisan naglusad na og imbestigasyon sa motibo sa pagpusil-patay sa biktima.
RadyoMaN Renz Barbarona
