General Santos City—Moabot sa dul-an 700 thousand pesos ang kantidad sa iligal nga droga ug mga tag-as nga matang sa armas ang nakumpiska sa operatiba sa PDEA-Regional Office 12, inabagan sa 34th Infantry Battalion, Philippine Army ug Alamada Municipal Police Station atol sa gihimo nilang buy-bust operation, alas 6:10 ang takna sa buntag kagahapong adlawa sa may Sitio Marabarak, Brgy. Guiling, Alamada, Cotabato Province.
Target sa operasyon nailang si Pilong Selangan, usa ka Hight Profile drug personality, kansa nakasibat human nakamatikod sa presensya sa awtoridad apan malampusong nadakpan atol sa operasyon ang kaubanan niining silang si Ali Adapan ug Usman Selangan.
Sumala ni PDEA-12 Regional Director Naravy Doquiatan, si Pilong Selangan ug mga kaubanan niini ang responsable sa pagpamaligya ug iligal nga droga sa munisipalidad sa Alamada ug kasikbit nga mga lugar sa probinsya sa Cotabato.
Nakumpiska gikan sa mga suspek ang mukabat sa 100 ka gramo nga shabu, nga gibana-banaang nagkantidad ug P680,000.00 ug P1,000.00 marked money.
Nakumpiska usab sa posisyon sa mga suspek ang 3 ka unit sa caliber 30 garand rifle; upat ka unit sa cal 5.56 M16 rifle nga adunay magazine; usa ka unit sa 7.62 M14 rifle nga adunay magazine ug mga buhing bala; usa ka unit sa improvised M79 grenade launcher ; upat ka handheld radio ug Cellphone nga ginagamit sa mga suspek sa ilang iligal nga transaksyon.
Kasong kalapasan sa Section 5 ug 11, sa Article II ilawom sa RA 9165, RA 9516 ug RA 10591 ang atubangon sa mga suspek kansa balhog na karon sa silda sa PDEA-12.
