Davao City – Patay ang usa ka menor de edad nga babaye human nabanggaan sa usa ka elf dump truck sa Purok 3, Barangay Linoan, Montevista, Davao de Oro (Davao-Butuan Road) kagahapon sa buntag (Marso 24, 2021).
Sa interbyu sa DXDC RMN Davao kang Police Captain Noel Hista, Acting Office-in-Charge (COP) sa Montevista Municipal Police Station (MPS), naila ang biktima mao si alyas Anica, 7 anyos, residente sa Barangay Linoan, Montevista, Davao de Oro, samtang ang driver sa truck nailang si Marvin Amyer, 45 anyos, minyo, negosyante, residente sa Purok 5, Barangay Magsaysay, Nabunturan, sa susamang probinsya.
Saysay ni Hista, lima sila ka mga bata nga mitabok sa maong dalan nga walay pedestrian lane apan wala mihunong ang biktima sa island rason nga nabanggan kini sa nahisgutang sakyanan, diin deritsong mi-surrender ang driver sa kapulisan human sa panghitabo.
“Kaning maong biktima, naligsan ni siya samtang nagtabok sa maong highway. Ang iyang mga kauban nihunong man didto sa may island, pero kini siya nag tuloy-tuloy, wala gyud siya nihunong. Mao ‘to nga siya maoy nabanggaan aning usa ka dump truck,” saysay ni Hista.
Gibutyag sa pulis nga reckless imprudence resulting to homicide ang kasong atubangon sa driver apan nagbaton na og amicable settlement sa barangay ang driver ug pamilya sa biktima diin pabayron na lamang kini og P100,000.
Panawagan sa police official sa publiko labi na sa mga residente nagpuyo daplin sa highway, nga bantayan ug kanunay’ng pahinumdoman ang mga kabataan nga likayan ang pag tabok-tabok ilabi sa mga national highway aron malikayan ang susamang disgrasya.
RadyoMaN Kirby Manzon
