Anaa na sa luwas nga kahimtang ang pito ka mga sundalo ang samdan human nabuthan sa anti-personnel mine sa Sitio Tubigon, Barangay Busdi, Malaybalay City, Bukidnon.
Kini ang gikumpirma ni Cpt. Ryan Layug, ang Civil Military Operations officer ug spokesperson sa 403rd infantry brigade human nga nagpagawas ug pamahayag ang New People’s Army kon NPA kalabot sa ilang tulo ka hugna matud pa nga tactical offensive diin duha niini kaniadtong Biyernes ug ang usa ang pagpabuto nila ug detonated CDX sa Barangay Busdi kaniadtong Sabado sa kadlawon.
Gihimakak usab ni Cpt. Layug ang propaganda sa mga NPA nga naghimo kini ug tactical offensive batok sa kasundaluhan Sitio Magawa, Barangay Bolonay, Sitio New Imbatug, Brgy. Kalabugaw nga pulos sakop sa Impasug-ong, Bukidnon.
Depensa niya nga ang nahitabo sa Brgy. Busdi lamang ang tinood.
Matud ni Capt. Layug nga gituis lamang sa mga NPA ang panghitabo ug gipasabot niya nga niresponde ang kasundaluhan sa taho nga adunay gitanom nga anti personnel mine.
Sa karon, giklaro ni Cpt. Layug nga ang nabuthan nga mga sundalo sakop sa 8th Infantry Batallion ang anaa na sa luwas nga kahimtang.
Una nang gipamahayag sa 403rd Infantry Brigade nga gipamatud-an lang sa mga rebeldeng NPA ang ilang pagka-terorista tungod sa ilang paggamit sa anti-personnel mine nga una nang gidili nga gamiton sa giyera.
Samtang giangkon sa rebeldeng NPA nga sila ang nagtanom sa anti-personnel mine.
