SAN CARLOS CITY, NEGROS OCCIDENTAL – PATAY ang isa ka bata nga lalaki matapos nga napilpilan sang dumptruck nga may karga nga bato sa Sitio Nabata-an, Brgy. Rizal, ciudad sang San Carlos.
Natabu ang aksidente matapos nga nadulaan sang kontrol ang dump-truck nga gina-maneho mismo sang amay sang biktima kaupod sang isa ka helper.
Nag-bunggo naman ang dump truck sa mga kahoy sa diin natumba ini kag didto na na-ipit ukon napilpilan ang pito ka tuig nga bata nga lalaki nga nakilala nga si Kyle Nazareno, residente sang Brgy. 1, San Carlos City.
Napatay gid ang bata matapos nga naglawig pa sa kapin isa ka oras antis nakuha ang iya lawas gikan sa natumba nga truck samtang, napilasan naman ang iya amay nga si Jerry Nazareno.
Pilason man ang helper nga si Renato Gomez, 33 anyus apang wala ini natam-an bangud nga de-buenas ini nga naka-lumpat./dyHB BACOLOD
