70% seating capacity ipatuman gihapon sa ‘DCOTT bus’

Davao City – Giklaro sa management sa Davao City Overland Transport Terminal (DCOTT) nga luyo sa pagpailawom sa Davao City sa Coronavirus Disease 2019 (COVID-19) Alert Level 1, ipatuman gihapon sa Public Utility Buses (PUBs) ang 70% seating capacity, inay 100%.

Sa interbyu sa DXDC RMN Davao kang Aiza Usop, DCOTT Manager, gipasabot niini nga ilawom sa Inter-Agency Task Force (IATF) Resolution No. 163-A, gipailawom sa COVID-19 Alert Level 1 ang Davao City, apan nagpabiling anaa sa mas istriktong status ang ubang lugar o probinsya sa Davao Region asa nagabiyahe ang maong mga sakyanan.

“Giingon didto sa atoang IATF Resolution nga 100% (seating capacity) kung Alert Level 1 ka. Pero we have to consider also the point of destination sa atoang bus,” tataw ni Usop.

Gikan Marso 1 hangtud 15, 2022 anaa ilawom sa COVID-19 Alert Level 2 ang probinsya sa Davao De Oro, Davao Del Sur, Davao Del Norte, Davao Oriental ug Davao Occidental.

Matud sa DCOTT Manager, istrikto usab karong gi-monitor sa Land Transportation Franchising and Regulatory Board (LTFRB)-XI ang mga bus operator aron masunod ang gipatumang guidelines gikan sa IATF.

RadyoMaN Kirby Manzon