Pagadian City – Dead on spot ang 72-anyos nga mag-uuma human kining gipusil sa wala maila nga responsable didtong dapita sa Purok Bayabas, Brgy. Banale niining syudad sa Pagadian alas 11:30 kagahapon sa buntag.
Naila ang biktima nga si Francisco Labrador, residente sa nasangpit nga lugar.
Dihang nadawat ang taho, largong niresponde sa lugar ang tropa sa Pagadian City PNP, naabtan pa nga nagbuy-od ang biktima sa tunga sa kalsada nga wala nay kinabuhi.
Sumala sa pamilya sa biktima, nagbaklay ang biktima aron mangita og sakyanan pabahada sa sentrong bahin sa syudad aron mobayad og buhis apan wala damha nga gibanhigan sa mamumuno.
Wala matud pay nadawat nga bahad ang namatay nga biktima ug gisugid pa sa tagtungod nga walay kontra ang ilang amahan.
Nakahiagom og upat ka pinusilan sa lawas ang biktima nga maoy hinungdan sa kamatayon niini.
Naglusad pa sa makuti nga imbestigasyon ang imbestigador sa Pagadian City PNP alang sa posibleng pagdakop ug pag ila sa nisibat nga suspetsado.
Sigon sa pamilya posible nga politika ang ugat hinungdan sa kamatayon sa biktima kay ilado man kini nga supporter sa politiko.
