Davao City – Usa na lamang ka barangay ilawom sa Paquibato District ang adunay problema sa hisgutanang pangkalinaw human gideklara sa Eastern Mindanao Command (EMC) ang laing walo ka mga barangay niadtong Pebrero 14 nga insurgency-free.
Kini mao ang gibutyag ni Lt. Col. Rey Pasco, commanding officer sa 16th Infantry Battalion, atol sa gipahigayong AFP-PNP presscon adlaw’ng Miyerkules diin sumala pa nga ang maong cleared and conflict resilient barangay sakop sa ilang area of responsibility.
“Kini mao ang Brgy. Paradise Embak, Malabog, Mabuhay, Fatima (Benowang), Lumiad, Mapula, Pandaitan, ug Cauayan,” saysay niini.
Gani sa pagkakaron ang Brgy. Tapac na lang ang wala pa madeklara nga cleared and conflict resilient barangay kinsa sakop sa 89th IB nunot nga wala na silay namonitor nga presensiya sa armadong grupo sa maong distrito.
Gipasabot ni Pasco nga pipila sa ginakunsidera aron madeklara nga insurgency-free ang usa ka barangay mao ang pagka-andam sa industriyalisasyon ingon man ang pagkabungkag sa mga underground mass organizations.
RadyoMaN Jason Amisola
