General Santos City–Karong adlawa ipasaka ang kaso sa kapulisan sa kalapasan sa RA 9165 batok sa walo ka mga dinakpan nga silang Mirasol Tesaluna, Shiela Mae Pendatun, Rex Mahinay,25 anyos, Rhealyn Sadaya, 22 anyos, Welbet Salarde, 28 anyos, Jeffrey Jay Buison, 24 anyos, Anthony Sas, 24 anyos ug Lester Avelino 24 anyos, kansa nasikop sa one time big time operation sa hiniusang puwersa sa Tambler PNP, Lagao PNP, Bula PNP ug ang mga personahe sa PDEA 12 sa managlahing lugar sa dakbayan.
Sumala pa ni Police Major Basher Alindo ang hepe sa Tambler PNP nga organisadong grupo ang mga dinakpan gumikan kay dili lang sa Gensan nagapahigayon sa ilang operasyon kundili nagikan pa sa Cotabato City.
Gipaklaro usab sa opisyal nga tungod sa ilang padayon nga operasyon batok sa illegal nga droga hinungdan nga malampuson nilang nasikop ang walo ka mga drug suspek.
Dugang pagbutyag ni Police Major Basher Alindo nga migamay na matud pa ang mga narekober nila nga illegal nga droga kini gumikan sa sunod-sunod nilang pagpahigayon ug operasyon batok sa ilang mga target suspek.
Nagtuo ang mga nahisgutang dinakpan nga mikalma na ang kapulisan sa ilang operasyon hinungdan nga mibalik na usab sila sa pagpamaligya ug ginadiling droga hinungdan nga nakuha kanila ang mga bulto-bulto nga droga ingon man armas ug mga bala.
Nasayran usab nga ang mga dinakpan ang anaa sa listahan sa kapulisan nga nalambigit sa illegal nga droga ug ang maong direktiba sa operasyon ang gikan matud pa sa bag-ong regional director ingon man sa city director sa dakbayan. (Reynald Timario)
