Maghimo sa lihok protesta ang pipila ka grupo karong adlawa dungan sa pagsaulog sa International Human Rights Day.
Sa interview sa RMN Malaybalay ngadto kang Micheal Pineda, ang council member sa Kilusang Magbubukid ning Pilipinas ug tigpamaba sa KMP-NCMR gibutyag niini nga nikabat sa walo ka mga harang kon checkpoint ang na-agian sa muakabat 2,000 ka delegado gikan sa Bukidnon padulong sa Cagayan de Oro.
Matud ni Pineda nga lauman nga muakabat ngadto sa 5-mil ka mga raliyesta ang maghimo ug lihok protesta sa Cagayan de Oro nga gikan sa nagkadaiyang dapit sa rehiyon.
Panawagan sa mao nga grupo nga ipatuman ang tinood nga reporma sa yuta.
Nasayran nga apil sa mga panawagan sa grupo ang pagpahunong sa martial law.
Samtang gihagit sa 4th Infantry Division, Philippine Army ang mga aktibista nga mahimong patas ug kondenahon ang mga human rights violation nga gihimo sa New Peoples Army kon NPA.
Matud ni Lt. Tere Ingente, ang Division Public Affairs Office Chief sa interview sa RMN nga pulos lamang alegasiyon ug pasangil ang gi-ingon pagsupak sa tawhanong katungod nga gihimo matud pa sa kasundaluhan.
Sigun sa DPAO Chief nga dili ang mga state forces ang nakahimo ug mga human rights violations kon dili ang mga NPA.
