80 pamilya apektado sa kusog nga balud sa Davao de Oro

Davao City – Nahatagan na og ayuda o family food packs ang 80 ka pamilya sa Barangay Cuambog, Mabini, Davao de Oro human naigo sa kusog nga balud ang ilang mga panimalay tungod sa Hanging Habagat gabii niadtong Biyernes, September 1, 2023.

Sa interbyu sa DXDC RMN Davao kang Ana Karina Cañete, Local Disaster Risk Reduction and Management (LDRRM) Officer 1 sa Mabini, iyang gibutyag nga sa 80 ka mga balay, 7 niini ang totally damaged samtang 73 partially damaged gikan sa Purok Makiangayon, Madasigon ug Mura Murahan.

Gipasalamat usab ni Cañete nga walay natalang casualty tungod sa insidente. Wala na usab sa evacuation center ang apektadong mga pamilya.

“Kuan man gud nga time, high tide. Mga 2 meters or 6.9 feet nga high tide. Kusog ang hapak sa balud. Hanging Habagat lang gyud. Walay bagyo. Pero enhance to siya nga Southwest Monsoon affecting Davao Region,” sulti ni Cañete.

Sa pagkakaron, ginaproseso na usab ang tabang nga pwedeng matunol ilabi na kadtong pamilya nga totally damaged ang balay.

RadyoMaN Kirby Manzon