Davao City – Gipaniguro sa Davao City Police Office nga hugot gayod nga mabantayan sa mga awtoridad ang tanang lugar diin himuon ang mga aktibidad sa ika-81st Araw ng Davao.
Sa interbyu sa DXDC kang DCPO Director Pssupt. Alexander Tagum iimplementa sa kapulisan inabagan sa laing security forces ang maximum security measures aron masegurong luwas ang katawhan ilabina ang mga bisita dinhi sa lungsod atol sa usa ka bulan nga aktibidad sa Araw ng Davao.
Matud ni Tagum mag-deploy pa ug dugang mga personahe gikan sa Police Regional Office XI ug mga force multipliers aron wala gayuy makalusot nga mga dautang tawo nga buot musabwag og kasamok sa dakbayan.
Uban sa DCPO ang Task Force Davao, PSSCC, CTTMO, BFP XI ug uban pang mga ahensya diha sa paghatag og doble nga seguridad sa maong kasaulugan.
Subling nagpahimangno ang kapulisan nga dili magdala og gibawal nga mga butang sama sa backpack, kutsilyo, armas sa mga event areas diin pagahimuon ang mga aktibidad.
RadyoMaN Aimee Guinita
