*Bukidnon* – Nagpadayon ang operasyon sa 8th Infantry Dependable Battalion kon 8th IB, Philippine Army batok sa mga New People’s Army kon NPA nga ilang nakasangka niadtong adlaw nga Huwebes sa Sitio Miaray, Mandahican, lungsod sa Cabanglasan, Bukidnon.
Una nang gikataho sa 8th IB nga ilang nailog ang kampo sa mga NPA sa mao nga lugar human ang tungag adlaw nga bakbakan.
Sa interview sa RMN ngadto kang 1st Lt. Erwin Bugarin, civil military officer sa 8th IB, gibutyag niini nga padayon nga ilang paggukod ngadto sa muabot ug 50 ka mga NPA nga nakasibat atol sa engkwentro.
Gidepensa usab ni Bugarin ang ilang paggamit ug air asset kon pagbomba tumong sa kampo sa mga NPA gamit ang helicopter attack.
Katarungan niya nga tungod kay naglisod sila ug sulod sa area gumikan kay naka-posisyon nang daan ang mga NPA sa ibabaw maong ilang gigamitan ug air asset.
Una nang gipahayag sa militar nga nakarekober sila sa kampo sa mga NPA ug Improvised Explosive Device, materyales paghimo ug IED, 300 ka mga buhing bala, 1 ug tunga ka sakong bugas, mga tambal ug uban pa.
Samtang sa karon anaa na matud pa sa luwas nga kahimtang ang usa ka sundalo nga nasamdan atol sa engkwentro.
Dungan ninii nanawagan ang AFP sa mga samdang rebelde nga mukanaug ug muadto sa hospital aron matambalan.
Subling gisiguro usab ni Lt. Bugarin nga ilang himoon ang tanan aron maprotektahan ang katawhan.
