Usa nga 9-anyos nga bata an gin pusil han duha nga hubog suspek ha P-2 Brgy. Cogon, Calbayog City alas 6 han gab-i kakulop Oktubre 15, 2017.
Gin kilala an biktima nga hi Aicol Dealagdon, residente han mao nga lugar.
Nakilala naman an duha nga suspek nga hira Jun Jun Derio nga taga Brgy. San Jose, Calbayog City ngan Nestor Debuton nga residente han Brgy. Cogon Calbayog City.
Sumala kan PSSupt. Nicholas Torre, Provincial Director han Samar Police Provincial Office nga nakainom an duha nga suspek ngan nangayat pa daw hin away ha nasabi nga lugar. Mahitungod nga waray may gumagad nga mga residente ha duha nga suspek in didto na nira nakit-an an usa nga bata nga babaye nga nagmumulay ha basketball court ngan tigda nala gin pusil kun diin naigo ini ha ulo nga dapit.
“Ang mahirap dito 9 anyos lang yung biktima. Hindi kami titigil hangga’t hindi nahuhuli ang mga suspek. Siguro hindi pa nakakalayo ang mga ito.” Siring ni Torre ha live interview ha RMN Tacloban.
An biktima in gin dara dayon ha Calbayog City District Hospital ngan ha pagka yana in ada pa ha kritikal nga kondisyon.
Samtang, matapos an insidente in kumalagiw dayon ha lugar an duha nga suspek.
Ha pagkayana in nagdudumara na hin hot pursuit operation an tinaglawas han Calbayog City Police Station ngan Samar Police Provincial Office agud madakop an mga suspek.
Dugang pa ni Torre, nga papasakahan dayon hin kaangayan nga kaso an mga nagpapaluyo hini nga insidente.
