9 anyos nga bata nga gitoohang nalumos ug naanod sa Salug Daku River, padayon pa gihapong gipangita

24

Tambulig, Zamboanga del Sur – Padayon pa gihapon nga gipangita hangtud niining mga panahona ang 9 anyos nga batang lalaki nga gitoohang nalumos ug gianod sa tubig sa suba kaniadto pang merkules sa hapon sa Salug Daku River nga sakop sa lungsod sa Tambulig .
Ang biktima giilang si Centino Eglesia Galpo, taga Purok Nangka, Lower Tiparak, Tambulig.
Base sa report sa Tambulig MDRRMO ug sa Tambulig PNP,alas 4 kaniadtong merkules sa hapon, nagdula dula ug nangaligo ang biktima ug ang duha pa niini ka kaubanan daplin sa Salug Dako River nga nahimutang sa Purok nangka, Brgy Lower Tiparak, Tambulig , apan mao na lamang ilang namatikdan ang kalit nga pagkawagtang sa biktima sa iyang nahimutangan.
Gisulayan matud pa ug pangita sa mga silingan si Centino ngadto sa suba nga nagkutay sa dapit kon diin kini naligo apan pakyas sila nga makit-an kini gumikan sa kalubog sa tubig sa suba.
Kagahapong adlawa, usa ka joint Search and Retrieval Operation ang gipahigayon sa mga barangay officials sa barangay Lower Tiparak, PNP personnel, ug ang Tambulig Emergency Response Team (TERT), MDRRMO ug mga volunteers.
Nagsugod ang pagpangita alas 9:00 sa buntag hangtud alas 6:00 sa hapon ngadto sa Salug Dako River paingon ngadto sa mga barangay nga kutay niini latas sa barangay Kapalaran, Balugo, San Jose, Sagrada Familia hangtud na sa coastal barangay sa Angeles sa lungsod sa Tambulig apan pakyas gihapon ang team nga makita ang maong biktima.
Karong adlawa, gikatakdang ipadayon pa gihapon sa team ang Search and Retrieval Operation sa paglaum nga makit-an na ang lawas sa biktima.
(Photo courtesy: Tambulig MDRRMO)

Facebook Comments