General Santos City–Mukabat na sa siyam ka mga barangay sa lungsod sa Alabel, Saranagni Province ang apektado sa mild el niño nga nasinatian sa kasamtangan.
Sumala ni Enriquito Daguplo, Municipal Agriculturist sa lungsod sa Alabel, ang mga apektadong barangay mao ang Barangay Pag-Asa, Datal Angas, Dumolok, Tocawal, Bagacay, Spring, Kawas, Paraiso ug Barangay Alegria.
Mukabat sab sa 600 hectares nga umahan ang naapektuhan sa nasinatiang el niño sa lungsod.
Dugang pagbutyag ni Municipal Agriculturist Daguplo nga sagad sa naapektuhan nga pananum gumikan sa hulaw mao ang mga upland nga pananum sama sa mais, saging, gulay ug uban pang mga produkto.
Dili tantong naapektuhan sa kasamtangan ang humayan tungod aduna may suporta sa tubig gikan sa irrigation.
Hinuon gibutyag ni Daguplo nga dili pa man ingon ka grabe ang epekto sa hulaw sa mga mag-uuma sa lungsod apan gikabalak-an nga mas mograbe pa sa sunod nga mga adlaw gumikan na usab sa nasinatiang tumang kainit sa panahon.
Ginahuwat nalang sa Alabel Municipal Agriculture Office nga makumpleto ang datus sa apektado sa hulaw sa lungsod ug higayon nga makumpleto na nila ang datus ila nang iduso ang pag deklara ug state of calamity sa kinatibuk-ang munisipyo.
Tumong nga mahatagan ug ayuda ang mga apektadong mag-uuma sa nasinatiang hulaw sa kasamtangan.
