Miabot na ngadto sa sobra 97 kilometers ang kataas sa wires o kable ang nakolekta sa task force nga gitahasan aron ipatuman ang oplan “Hapsay Kable” dinhi sa syudad sa Cagayan de Oro sulod lang sa usa ka bulan.
Kahinumduman nga nagsugod ang maong operasyon niadtong Abril pa lamang niining tuiga apan nga matud pa daghan na kaayong mga patay nga kable ang nangatangtang ug napulihan usab ug mga bag-ong mga wires ang mga daan.
Matud pa sa task force nga anaa na sila sa 88.24% sa ilang target of clearing sa bulan pa lamang sa Mayo. Niabot na usab sa 53 ka mga posting kahoy nga gibutang sa mga nagkalain laing telecommunications company ang ilang gipang tanggal.
Matud pa ni NTC regional director Teodoro Buenavista Jr. nga tumong sa maong proyekto ang irecycle ang mga nakolekta nga mga wires pinaagi sa pagpangita ug partner nga organisayon aron moabag kanila.
Gitun-an na usab matud pa ang ilang sunod nga tumong kung diin maghimo na ug underground cable system aron mas nindot ug hapsay pa ang kadalanan sa syudad. Kini nga proyekto ang gipailalom sa pangalang “Project Velez”.
