Davao City – Gipailawom na sa quarantine sa usa ka hotel sa syudad, ang 99 ka gipang- repatriate nga mga Overseas Filipino Workers (OFWs) gikan sa Fiji Island.
Sa interbyu sa DXDC RMN Davao kang Carmelo Elaya, OWWA XI OIC Regional Director, pinaagi sa emergency repatriation fund abagahon ang hotel quarantine sa mga OFWs.
Na-lockdown ang mga indibidwal sa Fiji Island sulod sa usa ka bulan hinungdan nga nagpatabang kini sa gobyerno.
“Atong usual nga ayuda, ang DOLE-AKAP program financial assistance program kay mao man gyod ning para sa mga affected sa pandemic. Pero naa pod tay mga laing programa kung muadto na sila sa ilahang mga probinsya, pwedi na sila mu-apply og programa sama sa livelihood program, scholarship program didto sa ilahang region,” matud niini.
Ang mga OFWs ipailawom sa napulo (10) ka adlaw sa quarantine ug gitakdang i-swab sa ika-pitong adlaw, una sila makabiyahe pauli sa ilang tagsa-tagsa ka mga Local Government Units sa nasud ug didto na tiwason ang upat ka nahibiling adlaw nga quarantine.
Niabot ang mga repatriated OFWs niadtong Miyerkules (Hunyo 16, 2021) sa Davao International Airport sakay sa Garuda Indonesia flight nga GIA 7630.
RadyoMaN Aimee Guinita
