General Santos City–Gikabutyag ni ABC president kapitan Antonio Octavio ang kasamtangang naghupot sa komitiba sa Peace And Order sa Sangguniang Bayan sa Polomolok nga makaalarma na ang nahitabong pagpamusil patay sa maong munisipyo kung asa duha ka kapitan ang sunod-sunod nga gipangpusil sa wala pa mailhing mga suspek nga silang si Kanhing Kapitan Vicente Yungco ug kapitan Nilong.
Sumala pa sa maong kapitan nga mismo siya gibati na ug kahadlok gumikan kay mga Barangay official na ang target sa mga kriminal nga wala nay kahadlok ug ginapiling panahon nga mopatay ug mga tawo bisan sa adlaw’ng tutok.
Apan gipaklaro usab ni kapitan Octavio nga wala man nagapasagad ang kapulisan sa kasong pagpamusil sa duha ka kapitan ingon man sa uban pang mga biktima gani sa pagkakaron nagpadayon ang gihimong imbestigasyon ug pagpangalap ug impormasyon aron matumbok ang mga motibo ingon man ang ilhanan sa mga suspek.
Saysay man usab sa opisyal nga kabahin sa kaso sa kamatayon ni kapitan Nilong dunay migawas nga impormasyon nga posibleng problema sa pamilya ang ginasundan karun nga hinungdan ug uban pang mga anggulo.
Nanawagan na lamang si Kapitan Octavio sa katawhan sa Polomolok nga mamahimong alerto sa tanang panahon ug tabangan ang kapulisan sa pagbantay sa seguridad aron mamintinar ang kahapsay ug kalinaw sa maong munisipyo tungod kay dili tanang lugar ang mabantayn sa kapulisan.(Reynald Timario)
