Davao City – Dili gayod perpekto ang justice system sa nasud apan tataw nga nagalihok kini bisan pa man kon niabot og usaka dekada una pa giluwat sa korte ang hukom niini sa infamous Maguindanao Massacre case.
Sumala ni Atty. Arnold Abejaron, Ateneo De Davao University (ADDU) law school professor, sa kadaghang akusado ug saksi, normal lamang nga niabot kini’g dugay nga panahon sa pagproseso ug pagbista sa kaso.
‘Guilty’ sa gipasang-at nga ‘multiple accounts of murder’ ug gi-sentensyahan og ‘reclusion perpetua without parole’ ang principal suspects nga sila Datu Zaldy “Puti” Ampatuan, Datu Andal “Unsay” Ampatuan, Jr., Datu Anwar Sajid “Ulo” Ampatuan, Datu Anwar “Ipi” Ampatuan, Jr., Datu Anwar Ampatuan, Sr. ug uban pang mga akusado.
Matud ni Abejaron, angayang magpabiling igmat ug i-monitor kanunay ang mga kumbiktado sulod sa Bilibid Prison.
Kung aduna may special treatment o mga reklamo, ipasang-at gilayon kini ngadto sa Office of the Ombudsman o uban pang pertinenteng ahensya sa gobyerno.
RadyoMan Aimee Guinita
