Davao City –Malaumon karon ang executive department sa nasud nga sa dugay o sa madali, mapanday ra sa gihapon ang usa ka maluntarong peace agreement kuyog sa mga Bangsamoro fighters sa Mindanao ubos sa landong sa Moro Islamic Liberation Front (MILF).
Sa usaka media briefing, gisugilon ni Presidential Spokesperson Ernie Abella nga sa kaso sa mga Moro sa Mindanao, klaro kun tino gayud ang paglaum sa gobyernong nasyunal gumikan sa gipakitang kooperasyon sa mga stakeholders.
Matud ni Abella, nausab na karon ang panahon gani siya nagtoo nga mas nasabtan na sa duha ka sangay sa atong balay-balauranan ang importansya sa kasabutang pangkalinaw.
“Things have changed…Congress has fully understood the situation,” dugang sa kalihim.
Sa na-unsyame ug kanseladong negosasyon uban sa CPP-NPA-NDFP, gitataw karon ni lead government negotiator Silvestre Bello III nga padayon pa nilang gihulat karon ang dugang instruksyon ni Pres. Rodrigo Duterte antes pa man masumiter sa gobyerno ang usaka ‘formal notice of termination’ ngadto sa NDFP panel ingon ngadto sa third party mediator nga nasud sa Norway.
Pikas bahin, sa latest update sa Siege of Marawi, nasayran nga mokabat na sa 460 ka mga bandidong Maute napatay sa panggubatan mientras aduna nay 111 ka mga tropa sa kagamhanan napatay sa war zone sa gyerang nilanat na ug kapin duha ka bulan.
Kasamang June Duterte
