Davao City – Gihukasan sa kumitiba si 1st District Councilor Nilo Abellera Junior nga nahitabo sa regular session sa konseho karong adlawa.
Gihubuan isip chairman sa committee on Peace and Order and Public Safety si Abellera nga gipaboran sab sa mga konsehal ganinang buntag.
Mismo si Majority Floor Leader Councilor Bernard Al-ag ang nagdeklara nga bakante ang kumitiba ni Abellera Jr. busa gilayon sila nagpili aron mahimong sunod chairman sa mao nga kumitiba.
Migula nga gipili sa mga kaubanang konsehal si 1st District Councilor Mabel Sunga Acosta aron mamuno sa gilangkat nga kumitiba gikan kang Abellera.
Gilayon gipanumpa sa atubangan ni Vice Mayor Paolo Pulong Duterte si konsehal Acosta aron mahimo nga opisyal ang iyang paggunit sa chairmanship.
Sa usa ka media interview, giingon ni Vice Mayor Pulong Duterte nga ang hinungdan kung ngano gipulihan sa pwesto si Abellera mao ang sagad nga pag absent sa maong konsehal sa session ingon man ang kanunay nga pagka sakit niini.
Nasayran nga wala mutambong sa session karong adlawa si Abellera.
RadyoMan Joel Viray
