Sindangan, Zamboanga del Norte — Suwerteng wa maantimano ang usa ka abogado human gipusil sa naka-motorsiklong mga mamumuno bandang alas 8:05 sa buntag, kagahapon adlawa.
Ang insidente nahitabo sa sulod sa balay niini didtong dapita sa Barangay Poblacion, lungsod sa Sindangan, ning lalawigan sa Zamboanga Del Norte.
Ang biktima giila sa kapolisan nga mao si Atty. Rogelio M. Dumdum, 64 anyos, minyo og lumulupyo sa susamang dapit.
Sa interview sa rmn-dxdr ni PSUPT. Joseph Maulad, hepe sa Sindangan MPS, nga tulo ka wa mailhing suspek nga nagsakay og motorsiklo xrm, kolor puti og itom combination, way plaka, ang nihunong sa national highway duol sa balay sa biktima.
Sumala pa ang duha ka angkas niini maoy nana-og sa motorsiklo og giadtoan ang balay sa biktima diin nagpatuong mga kliyente.
Ang usa sa mga suspek mao matud pay nipusil sa biktima, dayun paspas nisakay balik sa naghulat nga motorsiklo sibat gilayon sa wa pa matino nga dapit.
Ang biktima gihulagway nga naigo sa iyang dughan og uban bahin sa iyang lawas daling gidala sa mga silingan didto sa Sindangan District Hospital aron matambalan.
Nasayran gikan sa attending physician nga si Dr. Narcisa Cabillo, naka-angkon ug lima ka samad pinusilan ang biktima hinongdan gibalhin hatud sa tambalanan sa dakbayan sa Dipolog.
Nakarekober sa crime scene ang duha ka basiyo sa bala sa kalibre .45 nga pistola.
Dili pa masulti sa hepe kinsa ang mga kriminal apan posibleng adunay kalabutan sa trabaho sa abogado ang motibo sa insidente, human gibutyag sa asawa niini nga dunay gihoptan nga sensitibong kaso ang iyang bana.
Dugang pa sa hepe nga gipalawman pa nila ang imbistigasyon diin gisubay sab nila ang laing anggulo gawas sa propesyon sa biktima aron matugkad ang hinungdan sa pagpamusil ug mailhan ang nagpaluyo niini.
Photo (cc) Xenia Gwen
