"ABROADERS": Pano Mapoprotehiran ang mga OFWs? – Ini An Ley Series w/ Atty. Angel R. Ojastro III

23

Good morning sa mga paradangog kan DWNX. Dawa lipas na po, Happy Valentine’s Day man giraray saindo gabos. Pinapaabotan ta man po ning marhay na aga ang mga officers and staff kan HELP Learning Center, especially sina Dra Fe Delos Reyes, maam Ting, Mrs. Bolivar, saka mga ka-miembro ko sa HELP Board of Trustees sina Dra Acelita Llorin, Councilor Elmer Baldemoro, Dra. Escuadra asin iba pa. kan nakaaging aldaw magkairibahan kami sa sarong forum about inclusive education para sa mga kaakian na may disabilities, kaiba mi si mga doctors from Manila saka Baguio, mga kamagurangan saka mga NGOs hali sa iba-ibang lugar para sa advocacy na itratar kan gobyerno saka kan komunidad ning tama ang mga children with disabilities in compliance with the international convention on the rights of the child, saka sa international law on persons with disabilities. Ako po bilang miembro kan board of trustees kan HELP learning center, nag iimbita saindo na antabayan ta ang mga magiging discussion sa topic na yan sa mga masunod na aldaw. Kabali po sa mga may learning disabilities ang kids with ADHD. Im sure a lot of parents had been worrying if their kids have this, lalo kung masirot, mahirong sobra ang aki, or is it just part of their growing up, of being kids. We will be able to discover that kung tatawan ta ning mas na focus sa masunod na mga pag-oorolay ta ang ley sa mga aki na may learning disabilities. For now, Lets pray for these kids na may mga kapansanan.
Ngonian na aga, tawan ta ning atensyon ang mainit na naman na issue about mga OFWs. Dapat lang na pagorolayan ta ini, taano po?
Time and again, pa oro-otro na sana ini, dai nareresolbaran ang kamogtakan kan satong mga kababayan. Sa mga bareta ngonian, pirang ribong mga OFWs po sa Kuwait ang pinapauli na kan satong gobyerno dahil sa grabeng mga abuso kan mga employers ninda duman. Sa manlain-lain na parte kan kinaban, igwang mga reported na insidente ning pang-aabuso sa mga Filipino workers. Sa gabos na kontinente kan kinaban yaon ang Pinoy, hanggang sa Africa. Pagtios digdi sa Pilipinas, kawaran ning oportunidad sa trabaho, ang mga mayor na rason tano nagsasakripisyo ang mga kababayan ta. Masakit po baga maparayo sa pamilya. Ang gobyerno ta po pati, ginibo ng polisiya saka programa ang pagpatrabaho abroad. Imbes na tutukan ang pagdevelop kan sadiring tang mga industriya na suficiente sa gabos.
Pira po baga talaga ang numero kan satong OFWs? Siguro po kung nasa harampangan lang kita, pag naghapot ako kung sisay ang may parienteng nagtatrabaho abroad, kada saro saindo mataas ang kamot. Igwa kitang magurang, aki, tugang, pinsan, tito/tita, pamangkin – ano pa po, ah kabali palan ang mga agom, malilingawan pa logod ang mga agom.
Sabi pa sa data kan Philippine Statistics Authority na pigrelease kan April 2017:
Sa peryodong April to September 2016, 2.2 million ang Overseas Contract Workers (OCWs) ta. Sisay po ang inaapod na OCWs? Sinda itong igwang existing na kontrata sa pagtrabaho, 97.5 percent sinda kan total na OFWs. Ang tada na 2.5 % iyo si mga nagtrabaho abroad na mayong contract.
Sa bilang na yan, mas dakul po ang mga kababaihan. 53.6 percent po sinda kan total OFWs. Mas joven man ang mga kababaihan na OFWs kesa sa mga lalaking OFWs. Two-thirds (67.8%) kan mga female OFWs nasa edad na 25 to 39 years. Sa mga lalaki, sa parehas na age group, 25-39, 57.4 percent ninda ang nasa edad na ini. Out of 2.2 million na workers ta abroad, 34.5% sainda o halos 770,000 ang mga manual laborers; sunod ang mga nasa service and sales workers (19.0%), ikatolo ang mga plant and machine operators and assemblers (12.8%), sunod ang iba pang klaseng trabaho. (11.6%)
Ang Saudi Arabia po ang top destination kan mga OFWs. Halos saros a kada apat sainda nasa Saudi, boot sabihon, sa 2.2 million, halos 550,000 yaon duman. Sunod po ang United Arab Emirates (15.9%), ang Europe (6.6%), ang Kuwait ika-apat (6.4%), tapos ang Qatar (6.2%)
Gurano po ang total na naipapadarang kwarta kan mga OFWs sa Pilipinas? Sa sarong peryodo lang po kan 2016, sa laog ning anom na bulan lang, ang total remittance ninda nagabot sa 203.0 billion pesos. Kung magkaka mathematical assumption kita, sa sarong taon palan, nakakapalaog ning halos P406 Billion ang OFWs. Ining data po na ini base lang yan sa simbag kan OFWs sa survey, boot sabihon, conservative value palang po si 203 billion, baka mas halangkaw pa ang tunay na naipapadara.
Dahil sa kadakulan kan OFWs ta, igwa po kitang mga ley sa pagprotehir sainda. Anu-ano po yan?
Enot, igwang pinirmahan ang gobyerno kan Pilipinas kaidto pa na mga international agreements, arog kan International Convention on the Protection of the Rights of All Migrant Workers and Members of Their Families. Sarong treaty ini na pig sponsoran kan United Nations na naging ley para sa gabos na nasyon kan July 2003. Ang primary objective kan International Convention na ini iyo ang pagtao ning respeto sa human rights kan mga migrants. Ang mga migrants bako lang mga workers, sinda mga tao man kapantay kan gabos. Ginagarantiyahan kan international law na ini ang equality sa treatment, parehas na working conditions, dawa temporary migrant ka lang, siring sa treatment saka working conditions kan sadiring ciudadano kan dinumanan mong nasyon. Ang Kuwait po, kung sain nangyari si saros a latest na bareta ning pang-aabuso sa mga OFWs ta, bako pong signatory sa international agreement na ini para sa derecho kan migrant workers. Dai man nagpirma ang Kuwait sa international convention para sa equal na pasweldo sa mga workers, boot sabihon, depende na lang sa kung ano ang nakalaag sa kontrata nindo, mayo po ning minimum standards kan benefits para sa workers. Base sa findings kan Human Rights Watch saka ibang human rights groups sa Kuwait, sinda nakadokumento ning widespread na mga pag-abuso sa mga migrant workers, kabali ang dai pagbayad kan sweldo, halawig na oras ning trabaho halos mayong pahingalo o turog, rape saka mga physical assault, saka dai pagtao kan Kuwaiti government ning malinaw na sistema sa pagrereklamo. Yang findings na yan kan Human Rights Watch ang pinagbasehan man kan statements recently ni Presidente Duterte sa pagsaysay kan mga abuso sa Kuwait. Ang Human Rights Watch (HRW) sarong international non-governmental organization na nagkokondukta ning research and advocacy sa human rights. Ang Human Rights Watch man ang padagos na nagrereport sa international community kan mga nangyayari sa Pilipinas na human rights cases including the current anti-drug war. Boot sabihon, very credible po ining organization worldwide.
Balikan ta ang Kuwait. Dahil ang Kuwait pig-adaptar ang mga prinsipyo kan universal declaration of human rights, and dapat gibohon ni presidente Duterte sa pagbisita nya sa Kuwait, i-pressure ang nasyon na ini na magpirma sa bilateral agreement na magtatao kan mga proteksyon na nirerequire kan mga international conventions na ini. Ang Pilipinas po baga ang presenteng Chair kan ASEAN, kayang kaya nyang impluwensyahon ang ASEAN sa pagkaolay sa mga middle east countries na maglaag ning mga legal obligations para sa proteksyon kan workers kan ASEAN countries. Otherwise, puedeng maapektuhan ang economic relations kan mga nasyon sa middle east with ASEAN. Puede gamiton ni Duterte ang ongoing na orolay between ASEAN saka kan Arab Gulf Cooperation Council kun sain miembro ang Kuwait saka Saudi. Asymmetric bargaining po ang apod sa strategy na yan sa international law. Ang sarong sadit na nasyon arog kan Pilipinas puedeng makapressure sa darakulang nasyon sa pag gamit ning ibang nasyon na kaalyado kan Pilipinas. Halimbawa, pakinabangan man lamang ni Presidente Duterte ang relasyon nya sa China, sabihan nya ang China na i-pressure ang Middle East countries na ayuson ang mga ley duman para sa satong OFWs. Ang China iyo na ang pinakadakulang buyer kan Middle East oil. O sabihan nya si Presidente Trump na amigo nya na i-pressure ang Saudi, alyado ini kan US, na tawan fair treatment ang mga Pinoy sa Saudi. Tawan kundisyon ang duwang higanteng nasyon na ini, na kung dai magtabang sa Pilipinas sa paaging yan, puede nya gamiton ang ruling a pabor sato sa West Philippine Sea.
Dai ta lang po sigurado kung gustong gibohon kan satong gobyerno ang pag improve kan Kuwait sa proteksyon kan mga OFWs, ta ini po sarong human rights issue, baka may pagmati ang satong administrasyon na baka bweltahan man kita ning argumento manongod sa human rights issues sa satong nasyon. Pero maray na ipaheling kan gobyerno ang pagdepende sa human rights treaties, baka makatabang pa ini sa depensa kan Presidente sa International Criminal Court, na sya nagsusunod man sa ley saka nagpoprotehir man sa mga Pilipino base sa human rights principles.
Igwa kitang mga provisions sa presenteng Constitution na nagtatao man ning protection sa mga workers.
Igwang RA 8042, inaapod na Migrant Workers and Overseas Filipinos Act of 1995; saka ang nag amienda digdi na REPUBLIC ACT No. 10022, igwang RA 7111, PD 1694 saka PD 1809, may mga manlain-lain pang rules and regulations.
Kapos po kita sa oras ngonian na aga, may mga kaipuhan po kitang asikusuhon sa mga kasong kapot kan sakong law office, kaya po ang detalye kan mga ley na ini, both international law saka national laws ta, totokaron ta saaga. Importanteng maaraman nindo ang mga ini ta kung may problema ang saindong kapamilya abroad, aram nindo kung ano ang saindong mga puede saka dapat gibohon. Ako po personally nagamit ko ang kaaraman ko sa ley para si sakong tugang na dating nagtatrabaho as nurse sa Saudi years ago, natabangan ko kan siya naiipit na sa sitwasyon duman. May mga amigo po kitang nagdolok man sato para matabangan makahali sa dipisil na sitwasyon si mga agom asin tugang ninda. May mga pagkakataon po kaya na ang gobyerno dai naririparo ang satong concerns, kaya sa paagi ning kaaraman sa ley, puede kitang mag self-help.
Kung may mga hapot po kamo specific sa mga relatives nindo na OFWs, magtext or call sa numbers kan DWNX. Saaga po abangan ang pagpadagos sa topic na ini.
Bago ako magpaaram, isapuso ta ang sugo kan Diyos kung pano dapat trataron ang mga workers. Mayong pang aabuso, dapat fair, may pagmakulog. Kung ano po ang gibo ta sa kapwa, naheheling gabos kan Diyos. Gabos kita workders Nya para sa mga plano nya sa kinaban. We are all servants and workers of God. Sabi sa Bible sa –
Colossians 4:1 – Masters, give unto [your] servants that which is just and equal; knowing that ye also have a Master in heaven.
Luke 6:31 – And as ye would that men should do to you, do ye also to them likewise.
Saaga po giraray. Be safe, and God bless.
Ini po si Atty Angel Ojastro III Aramon an saindong derecho, INI AN LEY!!!

Facebook Comments