Davao City – Walay rason nga atong i-ban ang pagsulod sa mga Chinese visitors dinhi sa Pilipinas tungod lamang niining balatian nga 2019 novel coronavirus kun nCoV nga daghan nang nataptan ug namatay sa maong sakit nga naggikan sa Wuhan, China.
Sumala ni Davao City First District Councilor Mabel Sunga-Acosta, dili tibuok China ang naapektohan sa maong virus apan naggikan lamang kini sa gamay nga lugar sa maong nasod nga mao ang Wuhan, ang kabisera sa Hubei Province.
Matud ni Acosta, dili kita angayang mag-panic tungod kay adunay gihimong mga lakang o action ang gobyerno batok niini pinaagi sa mga preventive ug contingency measures ug walay rason nga makasulod dinhi sa nasud ang maong fatal ug makalilisang nga balatian.
Nagpasidaan si Acosta ngadto sa tanan nga tumanon lamang ang tanang mga pasidaan gikan sa Department of Health (DOH) aron luwas kita gikan sa maong balatian.
Nanawagan usab ang konsehala sa Unang Distrito nga dili magpataka og pagawas sa mga sayop nga impormasyon pinaagi sa social media ug bugtong tuhoan lamang ang mga website sa gobyerno nga maoy opisyal nga nagapagula sa ensaktong kasayuran aron malikayan ang walay igong basihan nga kabalaka, kahadlok ug kaguliyang sa publiko.
RadyoMan Bernard Pantallon
