Davao City – Ang mga kabataan mao’y gihulagway ni Dr. Jose Rizal nga paglaum sa nasud sanglit sila man unya ang mohulip nga henerasyon ug mohatud sa kaugmaon sa nasud-Pilipinas.
Apan mahatagan kaha og katumanan ang giingon sa National Hero nga ang mga batan-on maoy paglaum sa nasud kun ang klase sa young generation karon nalulong sa bisyo ug kahilayan ingon man walay pangandoy sa kinabuhi?
Subay niini, nipadayag karon og tumang kabalaka si Alliance of Concerned Teachers (ACT) Davao City President Reynaldo Pardillo sa migawas nga survey nga ang mga millennials karon walay pagpanglantaw sa unahan ingon man walay damgo sa kinabuhi.
Matud ni Pardillo, makaguol ang wala pagpakabana ug wala paghilambigit sa mga batan-on diha sa hisgutanang pangkatilingbanon nga maghatud unta sa maayong kaugmaon sa sunod nga henerasyon.
Nakita ni Pardillo nga kulang og motibasyon ang mga batan-on diha sa pagkab-ot sa pangandoy nunot sa paspas nga pagkahanaw sa gana diha sa kakugi nga maoy susi unta alang sa maayong kaugmaon sa kinabuhi.
Culprit ang teknolohiya ug modernong panahon sa pagpatay sa damgo sa mga hamtong nga silang kabatan-onan makatunob sa dan-ag nga kaugmaon.
Obserbasyon usab ni Pardillo nga dali nang mawad-a’g paglaum ang millennials ilabi na kun dili masunod ang ilang gusto and then gilayon silang mangundang sa trabaho.
Kini nga sitwasyon ang tutukan sa mga ginikanan aron makorehir ang ilang pamaagi sa pagmatuto sa ilang mga anak sarang ma-tisok ang gugma sa maayong kaugmaon sa kaugalingon ug alang sa progreso sa nasud.
RadyoMaN Joel Viray
