Davao City – Gi-uyonan karon sa mga magtutudlo ang sugyot nga magbaton og hard hat kun kalo nga makatabang sa mga kabataan kun estudyante batok sa linog.
Sa interbyu sa DXDC RMN Davao kang Reynaldo Pardillo, presidente sa Alliance of Concerned Teachers (ACT)-Davao City, gisaysay niini nga maayo kini nga sugyot apan nagkinahanglan kini’g dako nga pondo gikan sa gobyerno.
“Kung mahimo naa gyud dapat tay hard hat sa matag estudyante. Ang problema lang ana karon, wala pa gani nag increase ang sweldo sa mga teachers, mamalit napud mi ana. Maybe ato nang ilatid sa kongreso, sa pang gobyerno,” saysay ni Pardillo.
Gikanayon ni Pardillo nga dako ang tabang niini sa tumong alang sa kaluwasan sa mga kabataan apan nagkinahanglan kini’g pondo aron kini hingpit nga mapatuman.
Kahinumduman nga gisugyot sa KABALIKAT Civicom nga angay magbaton og hard hat ang mga eskwelahan kun kalo nga makatabang batok sa mga ‘debris’ nga posibleng mahulog panahon sa linog.
RadyoMaN Kirby Manzon
