Davao City – Girekomendar karon sa usaka hut-ong sa mga magtutudlo nga tutukan gayud ang tanang mga suliran nga nilutaw ug nasinatian sa kabatan-onan ubos sa blended learning scheme nga gi-operationalize sa estado niadtong October 5, 2020.
Sumala ni Reynaldo Pardillo, Alliance of Concerned Teachers (ACT) Davao City Division President, gikinahanglang adunay ensaktong guidelines pananglit sa oras sa online distance learning.
Dugang ni Pardillo nga sa bahin usab sa mga magtutudlo, daghan ang mga angay himoon usa na niini ang pag-convert sa learning contents ngadto sa digital format sama sa video ug audio aron mas masabtan kini.
Gipasalamatan usab nila ang RMN Foundation pinaagi sa ilang radio-tv brodcasting mode nga paagi sa pagtudlo sa mga kabataan.
Usa sa mga nakita nila nga problema kung nganong maglisud ang mga tinun-an mao nga kasagaran niini diha lang sa Pisonet o internetan modangop aron makaapil sa klase, usahay dili dayon makahuman kay wala nay signal ug mangita pa ug piso aron makapadayon.
Gitataw pa sa presidente sa ACT Davao nga ang paghimo ug pag-andam sa mga modules dugang usab kining trabaho alang kanila.
Ang problema sa modules mao nga wala kini himoa nga libro, busa nagkinahanglan na usab og picture gamit ang cellphone, problema karon kay dili tanang tinun-an dunay cellphone nga dunay camera o gadgets.
Pipila lamang kini sa nakita nilang mga suliran nga angayang hatagan ug pagatagad gilayon, dugang ni Pardillo.
RadyoMaN Bernard Pantallon
