Davao City – Gibigwasan sa Alliance of Concerned Teachers (ACT) ang Department of Education (DepEd) gumikan sa planong pagdili na sa mga magtutudlo nga magdala og trabaho pauli sa ilang mga panimalay sama sa lesson plans ug uban pang clerical works ug reports.
Gibatikos ni ACT Davao City President Reynaldo Pardillo si Education Sec. Leonor Briones sanglit wala tan-awa sa maong opisyal ang nagtipun-ok nga gimbuhaton sa mga magtutudlo tungod sa K-to-12 program.
Segun ni Pardillo, ang pagtiwas sa trabaho sa balay reinforcement lamang kini aron mahuman gayud ang lesson plans, topics ug aktibidad nga gikinahanglan sa mga magtutudlo tungod lang kulang ang unod sa K-to-12 program.
Matud ni Pardillo, maapektuhan ang kalidad sa edukasyon kung did-an ang magtutudlo nga makatiwas sa topiko kun lesson plans sa ilang balay ug mao kini ang wala makita nga epekto ni Briones.
Kung si Pardillo ang pasultihon, mas maayo gani kung hingpit nang wad-on ang paper works ug lunlon tudlo na lamang ang ilang atimanon aron sa ingon, de kalidad nga edukasyon ang ilang mahatag ngadto sa mga kabataan.
Gipalanog pag-usab sa ACT Davao President ang ilang panawagan nga dungagan na ang gidaghanon sa mga non-teaching personnel aron mao nay tugahan sa trabaho ug responsibilidad nga dili tahas unta sa mga magtutudlo.
RadyoMaN Joel Viray
