Davao City – Ginapaabot na lamang Davao City Overland Transport Terminal (DCOTT) ang tubag sa mga kumpanya sa bus kalabot sa gi-propose nga advance booking sa mga pasahero.
Sa pakighinabi sa DXDC RMN Davao kang Aiza Usop, DCOTT General Manager, gibutyag niini nga iyang gi-propose sa Southern Mindanao Bus Operators Association (SMBOA) ang advance booking sama sa ginahimo karon sa kauluhan.
Gipasabot ni Usop nga sa advance booking, pwede nang makakuha og ticket ang usa ka pasahero pipila ka adlaw ayha ang biyahe ug pinaagi niini malikayan usab ang pagtinukluray atol sa pagdagsa sa mga pasahero diin masiguro usab sumala pa nga dili ma-delatar ang mga biyahe.
Na-obserbahan sumala pa ni Usop ang kagubot labi na sa pagdagsa sa mga pasahero bisan pa man og ginapalinya kini pasulod sa terminal rason nga nahuna-hunaan niini ang maong pamaagi.
Apan giklaro ni Usop nga aduna gihapoy bus alang sa mga pasahero nga wala nakalukat og ticket ugaling positibo ang resulta sa iyang sugyot ug mapatuman ang bag-ong sistema.
RadyoMaN Kirby Manzon
