Davao City – Dako ang posibilidad nga pagpanghadlok lang ang katuyuan sa mga teroristang grupo sa sunod-sunod nilang pagpamomba sa pipila ka bahin sa Mindanao.
Buot sab matud pa sa mga teroristang grupo nga mabati sa kagamhanan ug sa katawhan nga aduna pa sila’y kapasidad sa pagsabwag og kaguliang luyo sa walay puas nga paglutos sa militar kanila.
Hinoon wala na gitumbok ni 10th ID Spokesperson Captain Jerry Lamosao kung unsa nga grupo sa mga terorista ang responsable sa sunod-sunod nga pagpamomba sa Isulan, Gensan ug Midsayap.
Gipamugos pa ni Lamosao nga walay koneksyon sa Martial Law ug balos sa subsob nga operasyon sa tropa sa gobyerno batok sa mga terorista ang sunod-sunod nga pagpamomba sa tulo ka lugar.
Hinoon, gitug-an ni Lamosao nga nalutsan gayod ang PNP ug militar sa mga terorista taliwala sa ilang ka-alerto ug hugot nga seguridad nunot sa gpatuman nga balaod militar sa Mindanao.
Sanglit nagalikay matud pa ang mga terorista sa mga checkpoints sa AFP/PNP mao nga dili dayon masapon sa mga hingtungdang otoridad ang presensiya sa ISIS Inspired group sa panahon mamomba sila.
Gipamugos pa ni Lamosao nga ang pagsumpo sa terorismo dili lang responsibilidad sa AFP UG PNP apan lakip na ang mga sibilyan.
Ang paghatag pagpakabana ug paghatag og impormasyon sa mga sibilyan dako ikatabang sa bahin sa mga otoridad aron pugngan ang bisan unsang planong pagpamomba sa mga terorista.
RadyoMaN Joel Viray
