Davao City – Maghimo og imbestigasyon ang 10th Infantry Division Philippine
Army ug pangitaon ang mga nabilin pang mga teroristang CPP-NPA nga padayong
nagapanghasi partikularminte sa Compostela Valley nga area.
Kini ang giluwatang pamahayag ni 10th ID spokesperson Capt. Jerry Lamosao
human nga mibusikad ang usa ka Improvised Explosive Device kun IED sa Sitio
Lawaan, Brgy. Kingking, Pantukan, Comval kagahapon sa alas 5:30 sa buntag
resulta sa pagkapagan sa tulo ka sundalo nga sakop sa 46th Infantry
Battalion Philippine Army nga sila CPL Michael P. Tabanao, PFC Albert R.
Cahepe ug PFC Jerome C. Penaranda.
Sumala sa opisyal nga pamahayag sa 10th ID, ang nahitabong pagpabusikad sa
landmine usa ka bayolasyon sa Comprehensive Agreement on Respect for Human
Rights and International Humanitarian Law (CARHRIHL) diin usa sa mga
probisyon niini mao ang pagdili sa paggamit og landmines.
Matud pa ang maong insidente nagpakita sa pagkamasinupakon sa nasangpit nga
kasabutan.
Padayong panawagan karon sa tropa sa gobyerno ngadto sa publiko nga
magpabiling magmaigmaton sa ilang palibot ug makigkoordinar gilayon kanila
og adunay mamatikdang di maayong lihok sa lugar.
Sa karon, na-manage na sa kasundaluhan ang sitwasyon samtang anaa na sa
luwas nga kahimtang ang mga samarang sundalo.
RadyoMaN Renz Barbarona
