Davao City – Gipaklaro sa 25th IB Philippine Army nga walay nahitabong pagpangdagit sa kasundaluhan sa 24 ka mga kabatan-onan apil na ang ilang mga instructors didto sa New Dalaguete Elementary School, Brgy. New Dalaguete, Montevista, Compostela Valley Province niadtong Pebrero 17.
Gibatbat ni Lt. Col Oscar Balignasay commander sa 25TH IB nga igo lamang niresponde ug ni-adto sa maong tunghaan ang kasundaluhan subay sa report nga adunay kasuspetsahang pagpanudlo sa giingong mga sakop sa NPA ngadto sa mga kabataan.
Gitataw ni Balignasay nga gipapauli sa kasundaluhan ang mga kabataan aron dili kini mapagan sa mahitabong engkwentro batok sa mga NPA nga anaa sa maong lugar.
Giimbitahan sa armadong kusog ang duha ka mga magtutudlo uban ang laing duha pa ka mga indibidwal tungod sa ilang mga kadudahang lihuk.
Nasayran nga ang upat adunay koneksyon sa mga NPA ug giila nga sila Eugenio Aparis Laurinte, 47, sakop sa Armed Propaganda Team (APT) SMRC ug taga- 47-A, Talomo Beach, Davao City uban ang usa pa ka 17 anyos nga instructor nga taga-Sta Emilla, Veruela, Agusan del Sur, Gredilix Ornopia, 23, taga-Brgy. Mayaon, Montevista, Compostela Valley Province ug Jocelyn Dasig, 41, sakop sa Sangay ng Partido (SP), SRC 4, SMRC nga taga- Purok 3, Brgy Camantangan, Montevista, Compostela Valley Province.
Nakuha gikan sa mga posesyon sa maong grupo ang mga subersibong dokumentos.
Gibutyag ni Balignasay nga human sa gihimong beripikasyon sa ilang pagkatawo gilayong gi-release ug gipapauli na sila sa ilang mga panimalay.
RadyoMaN Aimee Guinita
