Davao City – Angay gayod nga mag igmat ang mga ginikanan ug bantayan ang ilang mga anak aron dili kini mabiktima sa recruitment sa New People’s Army.
Sumala ni 10th Infantry Division Philippine Army Spokesperson Capt. Jerry Lamosao nga karong summer imonitor gayod sa mga ginikanan ang mga aktibidad sa mga kabataan.
Tambag ni Lamosao ilabina sa tribal communities sa may Talaingod, Kapalong ug Compostela Valley i-engganyo ang mga kabataan ngadto sa mga aktibidad nga makatabang nga mamahimo silang produktibo diha sa ilang mga komunidad.
“Mas maayo kung ang mga kabataan malingaw sa summer class, summer jobs o mga pa-liga sa ilang mga barangay,” matud ni Lamosao.
Matud niini nga dili mukuyog kung adunay mga kadudahang mga tao nga mudani og mga outings og lagyo o mutunol og mga pagpanudlo kontra sa gobyerno.
Dugang ni Lamosao gipalig-on nila karon ang paghatag usab og impormasyon ug edukasyon uban ang Department of Social Welfare and Development XI ug mga Local Government Units aron malikay usab ang mga kabataan nga gamiton sa mga kalihukan sa NPA.
Kahinumduman, nga pipila sa mga gidudahang nidabdab sa mga ekipo dinhi sa lungsod mga bata nga wala pay dise otso anyos kinsa matud pa sa mga awtoridad gipahimuslan lamang sa mga NPA.
RadyoMaN Aimee Guinita
