Walay plano ang Armed Forces of the Philippines kon AFP nga modeklara ug Suspension of Military Operation kon SOMO ngadto sa mga New Peoples Army kon NPA.
Sa interview sa RMN Malaybalay ngadto kang 1Lt. Tere Ingente, ang Divison Public Affairs Office Chief, gibutyag niini nga walay plano ang ilang kadagkuan nga modeklara ug SOMO tungod kay bisan kanus-a wala matud pa nahimong sinsero ang CPP-NPA sa ilang gideklarasiyong cease fire ug hinon gipahimuslan pa sa mao nga grupo.
Matud niini nga dili sila mutugot nga makasaulog ang CPP-NPA sa ilang 50th founding anniversary sa Disyembre 26 gumikan sa tradisyunal nga pagpatuman sa SOMO kada panahon sa kapaskuhan.
Sigun ni Ingente nga bisan ang Malakanyang ug Department of National Defense kon DND, uyon nga dili magdeklara ug ceasefire ang kasundaluhan batok sa mga NPA.
Mahinumdumang kaniadtong Biyernes, gi-anunsyo sa CPP ang ilang duha ka bahin nga unilateral ceasefire nga epektibo sa kadlawon sa December 24 hangtod tunggang gabie sa December 26 ug kadlawon sa December 31 hangtod sa January 1.
Gitawag sa DPAO chief nga paon lamang ang mao nga deklarasiyon sa CPP-NPA nga ceasefire ug naglaom nga balusan kini sa kasundaluhan.
Gidugang pa ni Ingente nga kung mubalibad sila sa pagdeklara ug SOMO sila na dayon ang pasanginlan sa NPA nga dili gusto sa kalinaw.
Giklaro niya nga gusto gayod nila sa sinsero ug malahutayong kalinaw ug dili lang sa mubo nga panahon.
Tumong usab daw sa ceasefire sa mao nga grupo nga maka-regroup, makare-organisa ug makasaulog sa ilang anibersaryo.
