Gipukaw sa makusog nga mga dagkong buto ang pipila ka mga kaatawhan sa probinsya sa Bukidnon alas 2 kaganehang kadlawon.
Kini tungod sa padayon karon ang engkwentro tali sa tropa sa kasundaluhan ilawom sa 8th Infantry Battalion ug grupong New Peoples Army kon NPA sa Sitio Gabunan, Brgy. Dumalaguing, Impasug-ong, Bukidnon.
Sa interview sa RMN DXMB Malaybalay karong buntag sa programang Straight to the Point ngadto kang Battalion Commander Lt. Col. Ronald Illana, gibutyag niini nga ang nadunggang dagkong buto ganehang kadlawon gikan sa canyon nga target ang mga NPA.
Matud ni Col. Illana nga nakadawat sila ug taho gikan sa mga concern citizen nga adunay presensya sa armadong grupo sa mao nga dapit hinungdan nga ilang kining gi-aksyunan nga maoy hinungdan nga na-engkwentro nila kini kaganehang kadlawon.
Giklaro usab sa batalyon commander nga wala pay airstrike nga ilang gihimo apan aduna nay presensya sa mga air asset nga nitabang sa paggukod sa mao nga grupo. Bala sa canyon ang nadunggang buto kaganehang mga alas 2 sa kadlawon.
Matud ni Col. Illana nga gibana-banang anaa sa 60 kapin kon kulang ka mga miyembro sa GF 89 ilawom sa Sub-regional committee 2 sa NPA ang na-engkwentro sa iyang tropa sa mao nga dapit.
Sa karon gisayran pa kung adunay nasamdan o kaha namatay sa grupo sa NPA samtang luwas ang tropa sa gobyerno.
Nasayran nga gawas sa engkwentro sa lungsod sa Impasug-ong, natigayon usab ang engkwentro sa Kalatungan Range, nga duol sa Brgy. Lilingayon, Valencia City kaganehang kadlawon.
