Mas pahugtan sa Armed Forces of the Philippines (AFP) ug Philippine National Police (PNP) ang ilang operasyon batok sa mga miyembro sa New People’s Army (NPA) isip pangandam sa ika-49 ka tuig nga founding anniversary niini ugmang adlawa, March 29, 2018.
Sa interview sa RMN ngadto kang 1Lt. Tere Ingente, ang tigpamaba sa 4th Infantry Division, Philippine Army gibutyag niini nga posibleng adunay planadong pagpangatakeng pagahimoon ang mga NPA.
Bisan pa man niini kanunay usab nga andam sa kasundaluhan ug hugot usab ang ilang military operation aron sa ingon dili magsilbi ang mga komunista.
Sigun Ingente nga na-andan na matud pa nila ang himoong pagsulong sa mga pasilidad sa gobyerno kada magsaulog sa anibersaryo ang NPA.
Una nang gibutyag ni Ka Malem Mabini ang tigpamaba sa CPP NPA Northern Mindanao Region atol sa interview sa RMN nga mas palig-unon pa nila ang rebolusyunaryong kalihukan sa ilang ika-49 ka tuig.
Samtang sa interview sa RMN ngadto kang PSupt. Arce Yam-oc, ang hepe sa Bukidnon-PNP Planning and operations, gibutyag niini nga kanunay na silang andam sa posibleng pagpangatake nga himoon sa NPA.
Nagpabilin matud pang ilang pagka-proactive kauban ang AFP aron magpabiiling malinawon ug luwas ang komunidad ilabina sa mga lugar nga kasagarang target sa NPA sa ilang mga pagatake.
Una nang gimando ni PNP Chief Ronald dela Rosa sa tanang hepe sa kapulisan ngadto sa tanan police regional directors ang mas lig-on nga tactical operation aron dili malutsan.
