General Santos City—Sikop sa operatiba sa kapulisan ang usa ka sumala pa Agent sa Rigen Investment group nga giilang si Bernie Hincuoy Solatorio, 44, residenti sa Bago Aplaya, Davao City atol sa gipahigayong entrapment operation nga gipahigayon sa usa ka hotel nga nahimutang sa Santiago Avenue, Barangay Lagao Gensan alas 10:30 ang takna sa buntag.
Matud ni Police Major Tirso Pascual, Hepe sa Bula Police station, usa ka personahe ang nahidangat sa ilang buhatan aron makig-alayon human duna matud pay personahe nga gaawhag kaniya nga mag-invest ug 2 million pesos.
Tungod niini gilayon nga gihimo ang plano alang sa himuong entrapment operation.
Usa ka Police nga nakabasi sa Regional Special Operation Task group-12 maoy personal nga mitunol sa marked Money ngadto sa suspek sulod mismo sa hotel.
Dihang gidawat na niini ang marked money didto na kini gidakop ug giposasan dayon gidala sa Bula Police Station.
Sa karon balhog na ang nasampit sa silda sa kapulisan ug takda na usab kining pasakaan ug kaso.
