Zamboanga del Norte – Giaprubahan karon sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles ang legal nga kasulatan nga nagtinguha sa pagtunol ug hinabang alang sa dugang nga kapanginabuhian sa mga kabus nga mga mag-uuma sa lungsod sa Liloy, Zamboanga del Norte pinaagi sa makinarya sa panguma.
Si Board Member Luzviminda E. Torrino ang mipasupot sa resolusyon nga naghatag sa otoridad ug gahum ni Governor Roberto Y. Uy nga mopirma sa Memorandum of Agreement (MOA) tali na ni Mayor Felixberto C. Bolando sa Liloy, Zamboanga del Norte alang na sa pagpalit sa duha (2) ka bag-o nga farmtractors aron sa ipagamit sa mga mag-uuma niini aron sa pagtikad sa mga kaumahan.
Kini nahisakop usab sa “Sustainable Agriculture Through Government Intervention Program (SAGIP) nga buot ipatuman sa lungsod sa Liloy sa lokal nga kagamhanan niini dungan sa paghatag sa kantidad nga Php 1 Milyones ngadto sa probinsiya isip counterpart fund.
Samtang obligasyon usab sa LGU Liloy nga maoy moamping ug lakip ang maintenance works sa farmtractors ug ingon man ang pagsumiter sa annual reports niini ngadto na sa probinsiya.
Kahinumduman nga ang Sangguniang Bayan sa Lungsod sa Liloy pinaagi ni Konsehal Feliciano V. Bolando ang mipasar sa Resolution No. 278-2017, series of 2017 may kalabot na sa pagpatuman sa SAGIP Program. (ept/ksd)
