Davao City – Pagdumot ang usa sa ginalantaw nga anggulo karon sa Digos City Police Station may kalabutan sa pagpusil-patay sa usa ka lalaki nahitabo alas-9:40 kagabie sa Jacinto-Bataan, Brgy. Zone 3, syudad sa Digos.
Biktima naila nga si Edu Amacio, 29-anyos, residente sa 1st Crumb St., Brgy. Zone 1, Digos City.
Sa eksklusibong pakighinabi sa DXDC RMN Davao kang SPO2 Hernan Blantucas, imbestigador sa maong kaso, gibutyag niini nga kaniadto pa nga asset sa ilang mga operasyon sa Davao del Sur ang maong biktima gani ubay-ubay na ka mga personalidad ang napadakop.
“Siguro katong ubang mga napadakop niya naka piyansa man, possible nga ang motibo ana kay revenge kay siya mismo nagapanghambog nga siya ang nakapakulong ato nila,” segun niini.
Gisaysay ni Blantucas nga adunay katagbo ang maong biktima niadtong tungora diin kasabay niini ang iyang ka-live in partner ug didto nahitabo ang maong pagpamusil gamit ang wala pa matino nga armas.
“Sa text man gud among nabasa nga anaa siyay katagbo nga diha silang lugara mag-abot… ang last giingon kay naa na daw sa Jacinto-Bataan ang suspek pero storyahon pa namo ang live-in partner kay murag nakaila niya pero sige pa’g hilak karon ug dili pa ka storya,” segun niini.
Gani, gitataw sa maong imbestigador nga hinabion pa nila ang kuyog sa biktima kinsa karon anaa pa sa estado sa pagka-trauma alang sa kasayuran sa tibuok panghitabo.
Matud niini nga nalambigit sa iligal nga droga ang maong biktima diin gitug-an sa kaigsoonan niini na naga-gamit sa gihapon kini bisan og mitahan na ug nipailawom sa rehabilitasyon.
Sa pagkakaron gipahiluna na ang patay’ng lawas sa biktima sa St. Peter Aurora Ext., sa maong syudad samtang padayon ang imbestigasyon sa kapulisan may kalabutan sa maong insidente.
RadyoMaN Jason Amisola
