Davao City – Gikaalarma karon sa Committee on Tourism and Beautification ang padayong pagtaas sa airfares kun plete sa eroplano gikan dinhi sa syudad sa Davao padulong sa nagkadaiyang lugar dinhi sa Pilipinas.
Sumala ni Davao City Councilor Al Ryan Alejandre, chairperson sa maong komitiba, mas mahal ang round trip airfare gikan dinhi sa atong dakbayan padulong Manila kung itandi sa General Santos paingon sa ulohan diin adunay 608 miles lamang ang kalay-on sa Davao to Manila, mas duol sa 649 miles nga General Santos to Manila.
Naglaum si Alejandre nga dili mamentaha ang mga airlines ilabi na nga nagkadaghan ang conventions nga ginapahigayon sa syudad diin nasayran nga usa ang SMX Convention Center sa ‘Top Event Places’ sa Pilipinas.
Gani gi-endorso kini nila sa Committee on Transportation and Communication nga gipangulohan ni Councilor Conrado Baluran aron subayon ang maong kwestyonableng presyo sa airfares.
Nanghinaut ang maong konsehal nga paubsan pa ug diyutay ang presyo sa airfares alang usab sa mga yanong gusto mubyahe sa nagkadaiyang dapit dinhi sa Pilipinas ingon man gawas sa nasud.
RadyoMaN Jason Amisola
