Cuartero, Capiz – Patay ang driver samtang pilason naman ang kaupod sini matapos nagbunggo ang ginamaneho sini nga tricycle sa isa ka Isuzu truck sa Barangay Nagba, Cuartero, Capiz kahapon sang aga.
Ginkilala ang driver nga napatay sa kay Esmael Enero y Henderin, 58 anyos, samtang pilason naman si Wenefredo Esperiano, 18 anyos, lunsay mga residente sang nasambit nga banwa. Santu sa imbestigasyon sang Cuartero PNP, ginasubay sang mga biktima ang dalan humalin sa Brgy. Bun-od padulong sa Cuartero Proper kun sa diin may karga nga sinako sang humay ang ila tricycle.
Apang sang yara na ang mga ini sa crossing sa Brgy. Nagba, hinali nga may nagguha nga isa ka truck nga ginamaneho ni Edgar Dela Cruz, 23 anyos ang pang-edaron. Bangud madasig ang pagpadalagan ni Enero sang iya tricycle, wala na sini makontrol ang manubela kag bumunggo ang mga ini sa truck.
Ginpangdala pa sang Cuartero Emergency Responding Unit ang mga biktima sa Dao District Hospital apang ginbawian sang kabuhi si Enero.
(Photo credit to the owner)
