Panit-an, Capiz – Patay ang mag-iloy matapos mabunggu-an sang salakyan nga ginamaneho sang isa ka katapo sang Bureau of Fire Protection sa Barangay EnseƱagan, Panit-an, Capiz. Nag-angkon sang mga kasamaran sa lawas ang mga biktima nga sanday Melia Baclas 35-anyos kag ang anum ka tuig nga bata nga si Nicole lunsay residente sang Barangay Agloway, Panit-an, Capiz.
Ginkilala naman ang driver sang salakyan nga si Fire Officer I Jay Paul Bernales 26-anyos sang Barangay Poblacion Ilawod, Maayon, Capiz kag isa ka miyembro sang President Roxas Fire station. Base sa imbestigasyon sang Panit-an PNP, samtang ginasubay ni Bernales ang dalan sa Brgy. EnseƱagan, natagpilukan ini rasun nga nabungguan ang nagalakat nga mag-iloy. Bangud sang mabaskog nga impact sang pagkabunggo, ginbawian sang kabuhi ang mga biktima.
Sa karon yara na sa kustodiya sang Panit-an PNP si Bernales kag nagapangayo ini sang pasaylo sa mga pamilya sang mag-iloy. Gin-ako man sini nga nabungguan niya ang mga biktima, nagpreno man ini apang ulihi na. Suno diri nga ginhingagaw pa sini nga dal-on sa ospital ang mag-iloy apang wala gid masugpunan ang ila kabuhi. Ginpasalig man ni Bernales nga handa ini nga magbulig sa pamilya sang mga biktima.
*(photo from web)*
