Isa ang patay kag isa ang pilason matapos magbunggu-anay ang duha ka motorsiklo sa barangay Sablogon, Passi City pasado alas 4 sang hapon (Oktubre 14)
Ginpahayag ni Police Supt. Arturo Fullero, hepe sang Passi City PNP nga dead on arrival sa Passi City District Hospital ang biktima nga ginkilala kay Ramil Pelaez, 38 anyos sang barangay Pangi, Passi City bangud sa patal nga pilas sa ulo nga iya naagum.
Samtang pilason man nga gindala sa amo man nga Ospital ang driver sang isa pa ka motorsiklo nga ginamaneho sang isa ka katapo sang 61st ID sang Philippine Army nga si Christian Jade Cesar, tumandok sang North Cotabato.
Suno kay Fullero nga nag-overlap sa karsada ang motorsiklo ni Pelaez kabangdanan nga nakabunggo ini sa kasugata nga motorsiklo nga ginamaneho sang army.
